Tangrruaralria Ugnaraq
Tawa-llu-gguq un' ugnaraq…
Ak'a-m ugnaraq.
Ayalria.
Pekluni.
Tawa-i-ll' ayainanermini
napameng ing'umeng
tekicartulliniuq.
Tekicamiu taw
civugtaarviklia
pagaavet
napaq tauna.
Napaq tauna
teguluku.
Iqutellinia.
Ucuqluni ellmineng
"Aal, wangni-ll'
wan' alingnaqvagg!"
Ayagluni imumeng
ayaagaqerluni-gguq
kingyaraa maaten
imna napaq
iqutellni
taperrnaam augn'
angucalaa.
"Cat makut
piukuyuteqatartatnga?"
Piyainanermini tawamt'-ll'..
tawa-m
nen'nekevruartupaarrlugmun
mat'umun tekitelliniuq.
Tekicamiu-am taw
civugtaarvikraarluku
pagna…
teguluku iqutellinia.
A, ucuqluni-m taw ell-,
ellmineng:
"Alingnaqvagg wangni!"
Ayaagaqerluni kingyaqertuq:
Ev'paarrluk augna.
"Ciin makut cat
piuruyutaqatnga?!"
Ayainanermini
imarpigmun mat'umun
kanaryartulliniuq.
Ugg'-, naken…
akul-, akul-, akulnguyaan
nalliikun…
tekicamiu taw
caciqwaurtuq…
"A, qaill' atak wii
pilii?
alukuma-llu?
Nalukuma-gguq wanigg'
qeckuma
meq peksaggngaitaqa?"
Uqlilliniuq.
Aal, qa-
atraarrluni
qeceglun' unavet
pilrii
meq peksaggluku
taw tuc'ami…
Naluktararallinii
kiitawani-gguq
melquni mecing'ngata
kic'ukaanguq
Kiitawani taw
civungqauranguq
tutniara-,
tutniareluni-llu.
Tawa tut'eqtararalliniluni.
Mayuqtarareluni.
mayuami tawa-m
qanertuq…
"A, engulerququma-gguq
wanigg' meq palarrngaituq?
Peksageskumku?"
Engulerqulriim-gguq taw
cillallungkili mermeng!
Maaten-am-gguq taw
ayaagaqerluni
kingyaqaraa
tauna qecellni,
imarpiutni:
nanvarraraag ugg'un
akulnguyaragnegun
qer'alliuq!
"A, ciin makut cat
piuruyutaqatnga?!
A, tawaten taw
taqlii.
Cat makut
piunrilengremeng
piuruyutelliniatnga."
Ak'a-m taw
iqukliarrluni.