Tawa-llu-gguq un'

ugnararaurluq una.

Igtegni malruk

amaqliqelriik.

Agqicugtaqelria,

uquviarrlugaq-gguq-qa

keggmiara.

Kuciqeraqan'-gguq

akuarrlun' nerqeraqluku.

A, kipakcartaqelria-gguq tawa.

A, kuciqeraqan-gguq

uquviarrlugaq akuarrluk'

nerqernauraa

kuciqallra tauna.

Piuraqerluni

kucirnanrilliniluni.

Kucirnanriqercilluku taw

Kaviarem tekitellinia.

Tekicamiu taw pillia,

"Waq'a, Ugnararuluuq uyuuq."

Aptellinia tawa-ll'

taum kaviarem:

"Ugnararaurluuq uyuuq…

Ciin taukuk cugg'egken

takvakartak?"

Ugnararuluum kiugaartaa:

"Lluatutun.

Neqaraq yaaqsingraan

nengqerlua kegqanritnayukluku."

"Ugnararaurluuq uyuuq ayay!

Iigken taukuk

kapgepagtak?"

"Lluatutun.

Qanugpagmi pekeskuma

iluarkayugnayuklukek."

"Elpeni-ll' kiutaaranruvagg."

"Ugnararuluuq uyuuq ayay!

Ciutegken taukuk mikpakartak?"

"Lluatutun. Cuk yaaqsingraan

qanqan niitenritnayukluku."

"Elpeni-ll' wan uuminaqvagg

kiutaaranruluten.

"Ugnararuluuq uyuuq ayay!

Melquten tamakut ackepakartat?"

"Lluatutun. Nalukuma

mecinertunayukluki."

"Ugnararaurluuq uyuuq ayay!

Iruten tamakut nanipagtat?"

"Lluatutun.

Tamelkapiaremi pekeskuma

kukiyagcugnayuklua."

"Elpeni-ll' wan' kiucuuvagg!"

"Ugnararuluuq uyuuq ayay!

Pamyun taun' nanipakarta?"

"Lluatutun. Pekeskuma

qamuqeltaryugnayukluku."

Kaviaram taum nerqallinia

tauna.

Tawaam-ll' taw

iqukliarrluni.